Masasagot rin ang iyong mga katanungan. Mawawala rin ang iyong pag-aalinlangan.

Ang mabilis na paglipas ng panahon, sinasasbay nito ang mabilis na pagbabago na pumupunit sa aking kalooban, at sa aking sariling pakiwari ay naibulong ko na lamang: Ano ang tunay kong misyon sa buhay? Ano ang dapat kong gawin?

Kailangan kong malaman ang kasagutan sa aking mga tanong ngunit hindi ko alam kung papaano. Nais kong malaman ang paraan para masumpungan ang aking pagtatanong.. Ayaw ko sanang lagi na lamang ganito, ayaw kong nagdadalawang-isip sa bawat hakbang na aking iyayapak. At sa paggising ko sa umaga, ibig kong imulat ang aking mga mata sa mundong puno ng pag-ibig at kapayapaan. At sa pagbangon ko, aking tutulutan ang aking kapwa sa kapighatian. Ang pag-ibig ay aking makakamit. Ang lahat ng bagay na naisin ng aking buhay ay mananatili sa isang sulok ng aking puso. Lalakbayin ko ang lahat ng dagat upang makamit ang aking bawat pangarap.

Ang buhay ay maikli lamang…Ako’y magpapatuloy sa paglalakbay ng malinis ang puso. Ngunit akin pa ring pagnanasa na masagot ang aking mga katanungan. Hanggang sa huling sandali ng aking buhay ay akin pa ring ibubulong sa sarili: Nagawa mo ba ang misyon mo sa mundo? Sa patuloy na pag-ikot ng mundo, sa patuloy na paglalakbay mo, masasagot rin ang iyong mga katanungan. Mawawala rin ang iyong pag-aalinlangan.